हरिवन,जेठ ११—सर्लाहीको हरिवन १ मा हात्ती प्रवेश गरी घर भत्काउन थालेको छ । मंगलवार (आज) बिहान करिब ३ः३० बजेको समयमा गाउँ प्रवेश गरेको जंगली हात्तीले हरिवन नगरपालिका–१, गमढिकुनाका भैरव बहादुर सिंंहको बासको टाटीले बनाएको कच्ची घरमा भत्काएको हो ।
हात्तीले सिंहको घर भत्काई घरभित्र रहेको एक क्विन्टल धान र चार क्विन्टल मकै खाएको प्रहरीले जनाएको छ । हात्तीको आक्रमणबाट घर र खाद्यान्न गरी अन्दाजी दुई लाख बराबरको क्षति भएको जिल्ला प्रहरी कार्यालय, सर्लाहीले जनाएको छ । केही समय अघि देखी नै सर्लाहीका विभिन्न क्षेत्रमा देखा परिरहेको हात्तीले जनधनको क्षति उर्याउन सक्ने भएकाले घाँस दाउराका लागि जंगल जादाँ र जंगलको बाटो भएर यात्रा गर्दा सजगता अपनाउन सुरक्षा निकायले स्थानीयलाई आग्रह गरेको छ ।
