काठमाडौं ,मंसिर -१४, काठमाडौँबाट रामेछापको लागि छुटेकाे फोर्स गाडी गोकुलगंगा गाउँपालिका–६ फर्पुमा दुर्घटना हुदा वडाध्यक्षसहित पाँच जनाको मृत्यु भएको छ।
गोकुलगंगा गाउँपालिका वडा नम्बर ३ रस्नालु जाँदै गरेको त्रिवेणी यातायातको ना१ज ७१२३ नम्बरको फोर्स गाडी शुक्रवार दिउँसो दुर्घटनामा परेको हो।
जिल्ला प्रहरी कार्यालय रामेछापका प्रमुख डिएसपी प्रदीपकुमार सिंहका अनुसार दुर्घटनामा परेर गोकुलगंगा गाउँपालिका वडा नम्बर ४ का वडाध्यक्ष रामचन्द्र बस्नेतसहित ५ जनाको मृत्यु भएको हाे ।
दुर्घटनास्थल दुर्गम र विकट क्षेत्र भएकाले उद्धारका लागि कठिनाइ भएको र घाइतेहरूलाई उपचारका लागि हस्पिटल पठाउने काम भइरहेकाे उनलेे जानकारी दिए।
दुर्घटनामा मृत्यु हुनेमा चालक हिराबहादुर कार्कीकाे पहिचान खुलेपनि अन्यकाे भने पहिचान खुलेको छैन। घटनाबारे थप विवरण प्राप्त हुने क्रम जारी छ।
मृतक वडाध्यक्ष बस्नेतले गत निर्वाचनमा नेपाली कांग्रेसका तर्फबाट चुनाव जितेका थिए।
