सर्लाही, कार्तिक -२०, जिल्लाकाे ईश्वरपुर -२ मा कार अनियन्त्रित भई पोखरीमा खस्दा, चालक सहित वेपत्ता २ जनाकाे शव र कार पाेखरीबाट निकालिएको छ ।
ईश्वरपुरबाट महोत्तरीको गौशलातर्फ जाँदै गरेको लु.२ च ६७५८ नम्बरको कार आज बिहान अन्दाजी ४ बजेकाे समयमा ईश्वरपुर नगरपालिका-२ मियाँखोरमा रहेको सरस्वती माविकाे पोखरीमा डुबेर वेपत्ता भएको थियो ।
जिल्ला प्रहरी कार्यालय मलंगवाका सूचना अधिकारी प्रनाउ दिपक श्रेष्ठका अनुसार सशस्त्र प्रहरी बल नेपाल नं.२ छिन्मस्ता बाहिनी बर्दिवासबाट आएको गोताखोर र अन्य सुरक्षाकर्मीकाे टोलीले मंगलवार बिहान ८:३० बजे २ वटा शव र बिहान ९:५० बजे कार पाेखरीबाट बाहिर निकालेको हाे ।
कारमा चालक गौशला नपा-१० का धनराज महतोको छोरा ३८ वर्षीय सुरेश महतो, महोत्तरीको सोनवा गाउँपालिका -८ का नबल किशोर ठाकुरको ३७ वर्षीय छोरा रामाकान्त ठाकुर र गौशला नपा- २ निवासी बिहारी राय यादवको छोरा ३१ वर्षीय जनक यादव सवार रहेका थिए । जनक यादव सकुशल बाहिर निस्किन सफल भएका थिए ।
गोताखोरकाे टोलीले सुरेश महतो र रामाकान्त ठाकुरकाे शव पाेखरीबाट निकालेको हाे ।
स्थानीयले कार पाेखरीमा खसेको जानकारी दिए पछि पुगेको सुरक्षाकर्मीहरुको टोलीले सकुशल उद्धारको प्रयास गरेको थियो ।
घटनाका सम्बन्धमा अनुसन्धान सुरु गरिएको जिल्ला प्रहरी कार्यालय मलंगवाले जनाएको छ ।
