सुमन घिमिरे/ लालबन्दी
चैत ८, लालबन्दी,प्रदेश नं. २ को लालबन्दी नगरपालिकामा नगर वाङ्मय परिषद गठन हुने भएको छ । लालबन्दी नगरपालिकाभित्रका सबै भाषा,साहित्य,कला, संस्कृति,सङ्गीत तथा दर्शनको संरक्षण,सम्बर्द्धन र विकास गर्ने उद्देश्यले नगर वाङ्मय परिषद गठन गर्न लागिएको नगरपालिकाद्वारा चैत ५ गते प्रकाशित सूचनामा उल्लेख गरिएको छ ।
भाषा, साहित्य,कला र संस्कृतिका क्षेत्रमा लागेका नगरभित्रका सम्पूर्ण सरोकारवालाहरूलाई लक्षित गरी प्रकाशित गरिएको सूचनामा चैत १४ गते शनिबार बिहान १० बजे लालबन्दी नगरपालिकाको सभाहलमा उपस्थित हुन भनिएको छ ।
लालबन्दी नगरपालिकाको यो कदमलाई स्थानीय सरोकारवाला व्यक्ति तथा निकायले सकारात्मक ढङ्गले लिएको र राष्ट्रमा नै उदाहरणीय काम भएको यससँग सम्बन्धित जानकारहरूले बताएका छन् । स्थानीय सरकारले नगरको समग्र पक्षलाई यसरी व्यवस्थित गर्दै लैजानु अत्यन्त सराहनीय कार्य भएको स्थानीयले बताएका छन् ।
