रौतहट,चैत —१५,जिल्लाको ईशनाथ नगरपालिका–६ जयनगरमा आगोमा जलेर एक बालिकाको मृत्यु भएको छ । अर्की एक बालिका घाइते भएकी छन् ।
गएराति अन्दाजी १० बजे मोजिबुल रहमानको घरमा आगो लागेको थियो । आगलागीमा परि उनकाे १२ वर्षीया छोरी राजिया खातुनको मृत्यु भएको जिल्ला प्रहरी कार्यालय रौतहटले जनाएको छ । मृतकी बहिनी १० वर्षीया सजिया खातुन घाइते भएकी छन् । उनको प्रादेशिक अस्पताल गौरमा उपचार भैरहेको छ ।
आगोले मोजिबुलको घरसहित १६ लाख रुपैयाँ र शेख ईशराजको घरसहित दुई लाख रुपैयाँ गरी १८ लाख रुपैयाँ बराबरको क्षति भएको रौतहट प्रहरीले जनाएको छ ।
भुस र दाउराबाट आगो सल्किएको हुनसक्ने प्रहरीकाे प्रारम्भिक अनुमान छ ।
