लालबन्दी,जेठ १३—सर्लाहीको लालबन्दी नगरपालिकाले नगर स्तरीय कक्षा ८ को परिक्षा दुर तथा खुल्ला पद्घतिद्वारा सम्पन्न गर्न सूचना जारी गरेको छ ।
कोभिड–१९ महामारिका कारण स्थगित गरिएको वार्षिक परिक्षा स्वास्थ्य मन्त्रालयले जारी गरेको स्वास्थ्य मापदण्डको कडाईका साथ पालना गरी लिन शिक्षा शाखा प्रमुख(उपसचिव) वासुदेव तिमल्सिनाद्वारा हस्ताक्षरित सूचनामा भनिएको छ । सूचनामा जेठ २० गतेदेखि २७ गतेसम्म परिक्षा सम्पन्न गरी जेठ मसान्त भित्र परिक्षाको नतिजा नगरको शिक्षा शाखालाई बुझाउनु भन्ने व्यहोरा उल्लेख छ ।
शिक्षा शाखाले जेठ २० गते नेपाली, २१ गते अंग्रेजी, २२ गते गणित, २३ गते विज्ञान, २४ गते सामाजिक अध्ययन, २५ गते कम्प्यूटर, २६ गते पेशा,व्यवसाय र प्रविधि र २७ गते नैतिक, स्वास्थ्य शारीरिक शिक्षाको परिक्षा लिन पनि सूचना मार्फत विद्यालयहरुलाई जानकारी गराएको छ । शिक्षक तथा अभिभावकहरुले भने सबै विद्यार्थी मोबाईल तथा कम्प्यूटरको पहुँचमा नभएकाले दुर पद्धतिबाट परिक्षा गराउन सम्भव नरहेको बताएका छन् । शिक्षा शाखाद्वारा जारी सूचना सामाजीक सञ्जालमा आएसंगै खुल्ला पद्धतिबाट परिक्षा गराउदा विध्यार्थीको स्वास्थ्यमा गम्भीर समस्या सृजान हुने भन्दै चिन्ता व्यक्त गरिएकाे छ ।
